Bono
Sa bidda de Bono naschet in sas costas de su Monte Rasu in sa cadena de su Màrghine.
Faghet parte de sa sub regione de Sa Costera, chi est cussa chi in època de su Medioevu fiat sa Curatoria de Sa Costera. Unu giassu prenu de forestas e armentos, difatis ammentamus chi in su territòriu b’est su litu de “Sos Nibberos” decraradu monumentu naturale. Atraessende su tzentru de sa bidda in Pratza Bialada b’at unu murales chi ammentat s’istòrica batàglia de sos motos antifeudales e s’istàtua de s’Alternos. Sa parrochiale de Bono est sa crèsia de Santu Micheli Arcàngelo, fraigada pagu prus o mancu a sa fine de su de XIII sèculos, chi at una fatzada de su Treghentos in trachite in colore de rosa. B’est finas sa crèsia de Santu Remundu Nonnato, dedicada prima a sa Vèrgine Assunta, chi est in su montiju in ue, in ocasione de sa festa de Santu Remundu s’ammentat sa batàglia de su 1796.
Sa famìlia Angioy
Don Pedru Nicolò Angioy, originàriu de Orane s’est cojuadu in Bono cun Margherita Arras, chi faghiat parte de una famìlia bene. S’erèntzia, si puru aiat orìgines nobiliares, s’est distinta in Sa Costera pro s’operadividade: non fiat una “nobiltade minore de campagna”, comente beniat definida dae s’istoriografia, ma una famìlia de proprietàrios lìberos, dinàmicos e industriosos chi ant fatu su bene issoro cun su traballu.
Sa pitzinnia de Giovanni Maria Angioy
In Bono Giovanni Maria Angioy e su frade Nicolò ant passadu sa pitzinnia, intristida dae sa morte de sa mama avènnida prima de s’ora. Sos annos de sa giovinesa issoro sunt istados signados dae s’educatzione atenta de don Taddeo Arras, tziu dae parte de mama, chi lis at imparadu a iscrìere, lèghere, fàghere de contu. Finas su babbu, a unu tzertu puntu de sa vida sua, los at lassados pro si fàghere preìderu.
Sos piciocos, sighende sos insinzos de su tziu Taddeo, sunt resèssidos a sighire sos bisos issoro: Nicolò s’est fatu preìderu e vicàriu de sa diòcesi de Nùgoro e Giovanni Maria, cando at finidu sos istùdios de lege e sa pràtica legale, at insegnadu in s’universitade e s’est fatu Magistradu. Est divènnidu giùighe de sa Reale Udièntzia, su tribunale de prus importu de su Regnu de Sardigna.
Bono e Sa Costera difendent s’Ìsula
Cando in su 1793 sa marina frantzesa fiat pro ocupare Casteddu, cabu de logu de su Regnu de Sardigna, Angioy est istadu unu de sos difensores de sa tzitade. Dae Sa Costera at fatu arrivire 300 cavalieris armados: unu grupu minore de òmines chi at agiuadu s’esèrcitu de su Re. Sa gherra contra sos frantzesos est istada fata pro su prus dae sas forzas militares pagadas e organizadas dae s’Istamentu militare. Sa conseguètzia de prus importu de sa “gherra patriòtica” est istada s’unione, in su beranu de su 1793 de sos tres Istamentos de su Parlamentu sardu cun s’ammàniu de sas famosas chimbe dimandas. Si preguntaiat a su Re su reconnoschimentu de sa dignidade de sos sardos e de sa Sardigna, salvada dae un’invasione perigulosa.
S’Assèdiu de Bono
A sos motos rivolutzionàrios chi ant caraterizadu sos annos dae su 1794 a su 1796 at sighidu una repressione pesante, atzesa e sempre bia dae parte de su guvernu règiu. Su movimentu antifeudale, galu biu, at retzidu unu colpu forte meda. In Bono, bidda icònica de su movimentu ca fiat sa pàtria de Angioy, 900 òmines armados, cumandados dae Efìsio Pintor Sìrigu ant postu in benùgru sa populatzione, arrivende finas a lassare sas crèsias sena sos finimentos sacros.
Sa corcoriga
Girolamo Sotgiu, professore de istòria moderna in s’Universidade de Iscìentzias de sa Polìtica de Casteddu, at iscritu chi sos abitantes de Bono ant custrintu sos assachiadores a “una pronta ritirada in sa cale meda sunt mortos e àteros feridos”. Finas como in Bono sa die de su 31 de Austu, si torrat a ammentare s’istòria. Su carru est ornadu cun frores e cannas, giutu subra su montiju, e sighidu dae sos cavalieris de sa bidda chi si bettant currende in mesu a una truma de gente. Arrividu s’ùltimu cavalieri una tzuca manna meda (nada “corcoriga”) est loddurada peri sa carrela chi giughet a su montiju comente signu de befe e pèrdida de sas trupas. Su sero si finit cun cantos e ballos de grupos chi benint dae logos meda de s’Ìsula.
Nàschida e fine de sos bisos de Angioy
Sa cosa prus ispantosa de sos bantos chi s’abate Berlendis at fatu a sos duos frades Angioy, piciocos bonesos istudiosos universitàrios in Tàtari, est chi ambos duos, bravos meda in sos istùdios, non beniant dae sa tzitade, comente si fiant istados de Casteddu e de Tàtari in ue sa cultura tzircolaiat e nemmancu dae una de sas tzitades règias, in ue bi fiant literados e bibliotecas, ma dae una bidda in su tzentru de s’Ìsula.
Sas raighinas de sa famìlia de Giovanni Maria Angioy benint, dae parte de su babbu in Orane e, dae parte de sa mama in sos Arras chi, comente famìlias meda de su dinàmicu tzetu pastorale aiat retzidu sas patentes de sa nobiltade dae sos primos de su de XVIII sèculos. Su fatu de tocare prus de unu tzentru de sa Sardigna tzentru settentrionale, finas a tocare sas tzitades prus mannas, est istadu unu de sos elementos chi ant permissu a Angioy de èssere sighidu in biddas meda.
Bono est istadu unu de sos logos chi at fatu un’isforzu mannu in su de ismanniare s’esèrcitu angioyanu, gasi comente àteras biddas de Sa Costera comente Anela, Benetutti, Bottidda e Urtei. Ma comente sutzedit bortas meda in s’istòria, custa unione s’est frimma cando est finida sa fortuna de s’Alternos. Pustis de sas dies dae su 18 a su 21 de trìulas de su 1796, cando sos bonesos ant aguantadu comente eroes a s’assachizu de sas trupas de Pintoreddu e pustis ant contratacadu sas trupas vitzerègias, finas in sa pàtria de Angioy b’est istada una divisione tra sos suos, cando unu grupu, cumandadu dae Giacomo Fara e Bonifàcio Cocco, est passadu a su campu realista, fatende crèschere sa tensione finas chi ant mortu don Andrea Mulas Rubatta, tenatze angioyanu, su 9 de freàrgiu de su 1798. Bono s’est àpida una bidda prena de violèntzia cun assartos, proas de bochimentos e furaduras de bestiàmine. Custa situatzione de gherra est finida cun s’insediamentu de sa corte de sos Savoja in Casteddu in su 1799. S’abistesa de su giùighe Valentino est istada sa de fàghere torrare dae s’esìliu Barore Frassu e Felitze Mulas Rubatta, duos de sos amigos prus mannos de Angioy, e de fàghere finire sas prepotèntzias de don Giacomo Fara, chi, pustis de su tempus passadu comente angioyanu, est divènnidu su puntu de riferimentu de sos nemigos de s’Alternos.
Bibliografia
L. CARTA, Il Settecento e gli anni di Angioy (1700-1799), Sassari, La Nuova Sardegna, 2011, pp. 147; 213
F. CASULA, Carlo Felice e i tiranni sabaudi, Dolianova, Grafica del Parteolla, 2019, pp 46-48
A. MORI, Sardegna, Torino, Unione Tipografico-Editrice Torinese, 1966, p 527
M. PINNA (a cura di) Bono e il suo territorio, Sassari, Edes, 2017, pp.119-126
Bibliografia web
https://www.sardegnaforeste.it
https://archiviostorico.unica.it/persone/angioy-giovanni-maria
https://www.comune.bono.ss.it
Credits
M.L. Melas, A. Nasone, S.A. Tedde
