Aristanis
Inditos istòricos
Tzitade de sa Sardigna otzidentale e cabulogu de Provìntzia, fiat istada fundada segundu sa traditzione in s’annu 1070 cando fiat istadu de su totu abbandonadu su bidditzolu de Tharros. Su territòriu at subidu in su sèculu XIX òperas de bonìfica a pustis de s’assutamentu de sos paules chi faghiant s’àrea indemada.
Fiat devènnida capitale de su Giuigadu de Arbaree e sa residèntzia de sos Giuighes, comente Marianu IV e sa fìgia Elianora de Arbaree famados chi aiant redatadu sa Carta De Logu una regorta de leges. In sa pratza Lianora de Arbaree b’at un’istàtua dedicada a issa e inaugurada in su 1881.
De s’atighidade de Aristanis abarrat pagu, de sos muros de sa fortificatzione antiga restat petzi sa turre de Santu Cristolu o finas connota comente a Torre de Marianu II. Sa residèntzia de sos Giuighes si deviat èssere aposentada acanta a s’edifìtziu chi oe est sa presone.
Intre sas numerosas crèsias de Aristanis sa prus importante est de seguru sa catedrale de Santa Maria Assunta chi resurtat giai mentovada in unu documentu de su 1131 e chi s’agatat serente a sa pratza de sa Crèsia manna.
Sa deruta de Angioy comintzat in Aristanis
Est cummovente sa lìtera chi su 8 làmpadas de su 1796 sos deputados de su Logudoro iscrient a su vitzerè dae Aristanis, mutende a Angioy «Istimadu Alternos e babbu», cumbintos finas a s’ùrtimu a lu sustènnere e a l’amparare. Paràulas chi, si puru espressadas cun un’atza a beru e chi, a bi meledare a pustis giai ammustrat sos primos tzinnos de su disacatu e disàura imbeniente. Arribbados a sa custa chi est istada sa capitale de sos Arbaree cara a mesudie, sa truma de sos rivolutzionàrios ghiada dae s’Alternos pariat a beru unu fiotu de gente chi pariat non timire esertzitu perunu, movende forte cara a Casteddu. Lassadu su Logudoro s’armada angioyana aiat bidu ismaniare∙si su cunsensu e a pustis de Arriora, cun s’agiudu de Don Bisenti Liqueri, notàriu cabrarese e partigianu angioyanu, fatu chi cumproat chi su bisu de un’assentu nou de su rennu aiat barigadu sas làcanas de su cabu de subra. Istrangiadu dae don Giuanne Pedru Foys, G.M.Angioy, o pro àere tentu una seguresa manna o fortzis pro àere bistentadu gasi medabenit cotuladu dae sa nova de s’armistìtziu de Cherasco chi su Re aiat concruidu cun sa Frantza rivolutzionària.
Custu sèberu de isetare li fiat istadu fatale, sa tropa agiolotada fiat arribbada in deretura a dare infadu a sa populatzione locale, finas a sa tràgica fine. Su 12, cumproada sa resistèntzia casteddàia a sos propòsitos suos aiat lassadu Aristanis pro cròmpere a Tàtari. Embremàtica sa frase chi aiat naradu pensende a su pesu grae che teniat in coddos e chi diat àere dèvidu galu aguantare: «super dorsum meum aedificaverunt peccatores».
Sas lìteras aristanesas de s'Alternos
Dae sa tzitade de s’antigu rennu de Arbaree Juanne Maria Angioy aiat iscritu in su mese de làmpadas de s’annu 1796 unas cantas lìteras, indiritzadas como a su Vitzerè como a sos Istamentos. Sos documentos, de importu mannu a beru, sunt istados publicados in su traballu de Luciano Carta de pagu publicadu subra de sa faina de sos Istamentos in su triènniu rivolutzionàriu sardu. In una de custas lìteras, datada 9 de làmpadas 1796, est ladina sa determinatzione de s’Angioy de chircare s’agiudu de sa Repùblica frantzesa pro sighire su chertu:
«Illustrissimi e reverendissimi signori […] non occorre di rammentare le vicende, alla quale fu sottoposta la tranquillità, ma crederei, che colla mediazione della Repubblica francese potrebbero terminarsi felicemente, e con soddisfazione di tutti i buoni le nostre vertenze. Questa Repubblica, che ha già fatto la pace con Sua Maestà, essendo savia, illuminata, e spregiudicata, saprà determinare i dritti della sovranità, e quelli della nazione sarda»
Bibliografia
L. Carta (a cura di), L’attività degli Stamenti nella «Sarda Rivoluzione» (1793-1799) in Acta Curiarum Regni Sardiniae, 24, Cagliari 2000, p. 2239, doc. 616/4
R. Carta Raspi, Storia della Sardegna, Milano, Mursia, 1974; pp 399-709
E. Putzulu, Dizionario Biografico degli italiani, volume 31, 1985
A. Sanna, Le torri, le porte e le mura medievali della città di Oristano, Oristano, Fondazione Sa Sartiglia Onlus, 2019, pp. 89-113
Testos
M. L. Melas, A. Nasone, S. A. Tedde
